Zot i souvien sirman la réform la konstitisyon l’ané 2003. Dann tan-la, Virapoullé lété sénatèr é konm an tou tan lo boug lé obsédé par in sèl késtyon : vérouy lo léstati La Rényon, tèl fason ké la gouvèrnans nout péi i bouj pa. Donk lo boug k’i èm bann kozman i sone bien l’avé di : "Li vé pa bann loi péi !". Biensir bann mouton i suiv ali : kan li di béééé, banna i di bééééé. Kan li di "Pa d’loi péi !" bann mouton i kriy "Pa d’loi péi". L’èr-la lo sénatèr l’avé déklar son l’amanman "i grav dann marb la konstitisyon, la gouvèrnans La Rényon".

Dabor na poin arien i grav in sityasion dann marb. Sak in majorité la désidé, in n’ot majorité i pé fou a-tèr. Si nana vréman in volonté réèl dann lo péi. Solman lé bien zoli di konmsa "pa d’loi péi, pa d’loi péi", mé sak nou la romarké : la pa tout sak i désid pou la France lé bon pou aplik tèl-kèl pou La Rényon é tazantan, dann désèrtin ka lé bon modifyé in pé la loi. In légzanp ? La loi dsi bann sign rolijyé, koman i aplik sa La Rényon ? La prèv, sa in loi isi i aplik pa... Na d’ot ka ankor : par égzanp bann trété internasyonal ? Si sa lé viré dsi nout lékonomi konm in pistolé, mi pans pa lé bon ni lès tyé anou, é nou la poin in pti mo pou dir.

Donk virapoullé la fé vote in sinkyèm amanman dsi lartik 73 é d’apré sak Vergès i di sé in n’afèr kouyon vèy pa koman, é an pliské sa initil épi danzéré, donk li domann prézidan la Répiblik in réform la konstitisyon pou artir l’amanman Virapoullé ; lé shoz i suiv zot kour é nou va oir la suit.

NB : Mi sort lir Érika Bareight li osi i domann k’i siprime l’amanman 5 lartik 73.

Justin