Journal fondé le 5 mai 1944
par le Dr Raymond Vergès

Cliquez et soutenez la candidature des Chagossiens au Prix Nobel de la Paix

Lakey lo sit > Chroniques > Oté

Pa d’nouvèl, bone nouvel !

samdi 10 févrié 2024, sanm Justin


Mézami néna in moi bann La franss la nome in gouvèrnman kroupion, avèk présspa d’moune dédan é anpliské sa, lo moune ké l’avé sé konm ki diré demoune la pa invante la poude. Dann laktyalité téi di téi sava nome ankor in vintaine moune mé téi nome pa.


Sé l’èr ké dann mon koin, mwin téi di gouvèrnman la désside lèss anou in pé trankil pou in foi. A bien rofléshir san miniss loutremèr mi panss ni pé viv. Antouléka sé sak mwin téi panss… Mwin la touzour antann mèm san gouvèrnman in péi i pé viv — antouléka sé lo ka l’Italie k’téi pass lo pli d’tan san gouvernman k’avèk.

L’avé solman bann maoré té apré rode in lintèrlokitèr valab é konm zot téi trouv pa, fatigué oir lé z’ote bar shomin sé zot — batizé forss viv — k’la désside bar shomin épi kite lo baraz an plass konmsa kan zot i kour zot kaz lo soir sé bann indézirab téi pran zot plass dsi lo baraz. Antouléka l’avékékshoz okipé vinn-kate dsi vinn-kate.

Sa sé bann maoré é mi kite azot débrouye zot kari par zot mèm, vi ké gouvèrnman la sétyèm puissanss mondyal l’apré fé sak li l’apré fé avèk zot.

Mé pou rovnir dsi lo réstand’gouvèrnman i paré yèr dan la nuite la nome lo réstan é an parmi in bann miniss délégué-donk inn pou bann péi l’outremèr mi sava pa dir azot lo nom pars sa i shanz si tèlman souvan ké lé pa nésséssèr ankonb zot dik dir avèk sa. Biento nora in n’ote.

Pa d’nouvèl bone nouvèl, mé in mové nouvèl lé pa forsséman nésséssèr.

A bon antandèr salu !

Justin


Inn modékri, inn ti lavi, inn komantèr ?

signaler contenu


Facebook Twitter Linkedin Google plus