Lakey lo sit > Chroniques > Oté
Pa in sèl moun san son troi ropa par zour ! Si i gingn pa la départmantalizasyon lé an fayité : tak baro, zète la klé !
mèrkrodi 27 novanm 2019, sanm
Si zot la ékout radyo fransintèr yèr matin, zot la sirman antann dir lo bann « résto di kèr » i sort rouv son kanpagn livèr-son trant troizyèm kanpagn. Moin pèrsonèl sa i énèrv amoin antann in n’afèr konmsa, sirtou dann La Frans, in péi rish, inn an parmi lo bann péi pli rish néna dsi la tèr konmsi téi falé mète demoun kaziman dann la man disité : plis nèf san mil pèrsone va vni rode man zé dann bann résto-la é zordi dann La Frans néna plis nèf milyon demoun pov.
Mé zami, sa sé kant mèm in éskandal, in n’afèr konmsa dir bann résto di kèr i distrivbyé parla trant milyonn ropa dann inn kanpagn sa sé lo bilan lo kapitalism, kapab dann in linivèr rish mète dann la po vrété in kantité d’moun konmsa. L’èrla ni pé poz anou késtyon é lo prinsipal sé sa : si l’avé poin lasosyasion la, épi d’ot an kor, kosa demoun nora manzé ? Arien la plipar d’tan sansa sirman pa dokoi ranpli zot boujaron. An plis i fo pans an parmi tousa d’moun-la, néna bann vyé moun, bann moun malad, bann zanfan, bann andikapé, bann fèb, zot préstasyon i sifi pa pou viv.
Mé zami, astèr, si ni rogard in pé otour d’nou, isi La Rényon, kosa ni pé fé konm réfléksyon ? Kèl solisyon i pé trouvé pou bann demoun dann shomaz, san z’ète indamnizé ? Mé zami m’a dir azot franshman, la fin d’moi i ariv plizanpli bonèr pou bann pov isi shé nou. Alor bann moun-la i vote sa é kosa néna pou zot dann tout program i sava distribyé la ?kosa néna pou sèye ranpli zot vant kan i fo ? Pétète rien, pétète pa sifizaman. Zis do koi pou dir k’i pans azot-sof pou ashté zot voi.
Alor, konm moin la ékri dann la somenn : di amoin zot, si lé pa posib règ lo problèm la grann mizèr isi shé nou ! Di pa moin néna in mank larzan ! Larzan i mank pa. Alor dann tout program mi yèmré trouv in propozisyon dann tout komine é propozisyon-la i pé z’ète : Pa in sèl moun san son troi ropa par zour ! I gingn pa ? Si i gingn pa sa i vé dir la départmantalizasyon lé an fayite. Tak baro, zète la klé !
