Lo gouvèrnman la fini par désid mète le RSA partou, konm sa, va fé travay plis pou d’moun é bann moun i gingn lo rmi va travay épi va gingn in moné an plis : i pé pa ète in mové nouvèl, vik na in bonpé dmoun lé shomèr épi i toush solman in moné la pa sifizan pou viv in pé konm k’i fo.
Solman, konm d’abitid la désid mète in linpo an plis pars i fo trouv in miliar l’euro, alors lo gouvèrnman la désid mète in l’inpo déssi "le capital". A bon, bann kapitalis, zot té i kroi té i sar pa grafine azot in zour. Bin zot la tronpé ! Pran sa pou zot !
Sof ké sak nana in gro moné, sak lé pli rish lé riskab pa péyé, vik zot i pèy déza lo maksimome, sak lé prévi dann lo bouklié fiskal... Bin kissa va pèy sa alor ? Sak nana in moné plasé, kisoi in klass moiyène, kisoi in pti travayèr, sansa in moun la pran in l’asirans-vi, ou bien in moun la épargn in moné. Bin la, sé pi in bon nouvèl pou la mazorité d’moun !
Pou kansa so RSA ? Pou lané k’i vien akoz avèk lo gouvèrnman i grate pa le popièr, i fé la vitèss, i fé blinng-blinng. Mé konm diré l’kont, karapate i mont touzour déssi tété bèf mèg. Vik i paré, méssié Jégo i sort di : patati-patata, Gasparin-Brinet, lé possib i aplik sa solman an 2010. Sa la pa in si bon nouvèl ké sa pou nou !

Justin