An parmi noute kamarade néna ankor i arète pa kontinyé propoz sa mé konm sé parti kominiss k’i propoz bann fors sossyal épi politik dopi dé zané é dé zané la pa trouv lo tan pou prépar in gran rényon konmsa aprésa pou ranvoye sa dsi lo gouvèrnman pou mète an plass kékshoz konm in loi program osinonsa in plan pou anbèk dsi noute dévlopman véritab.

Pou kossa mi di sa ?

Pars dsi radio Freedom néna in lémission lo bann zoditèr i rozistr méssaz ; in minite sa i dir. Biensir ladan néna a boir é a manzé. Néna dé shoz lé négartif mé d’ote lé tré pozitif. Sé konmsa ké mwin la antann néna dé-troi zour in siplik pou bann zom politik. Lo ga té i di : « azot bann zom politik, zot lé nonbré. Akoz zot i réinir pa pou propoz gouvèrnman sak i fo fèr pou La Rényon ? ». lo ga té i plézanté pa é sanm pou mwin li lété vréman sinssèr kan li téi koz dann téléfone-la..

Son minite passé, dizon demoune la fine obliye ali. Poitan si la solission téi pass par-la ?si la propozission noute parti lété sak téi fo fèr dopi lontan ? Ki di ké si in propozission konmsa lété aksépté noute péi noré pa été in pé pli avanssé ké li lé koméla ? In pé pliss dévlopé pars dévlopman nou la bien bézwin é sé par lo dévlopman ké nou va myé viv issi shé nou.ki di si lé pa par la nou sar kapab ranforss noute viv ansanm, mèm anpèsh ali kapote dan la kivète.

A bon antandèr salu !

Justin