Zot i koné lo lésprésyon ki di “ki vé nouay son shyin, i akiz a li d’awar la raz“. Néna i di osi “pou débarass a ou in moun ousinonsa in nafèr, néna in takon prétèsk“ ou pé di osi “Domoun lé touzour dan lé tor minm kan li lé drwat, zis pou sanksyonn a li“. Sé in manièr dirèk pou liminn in moun ké lé konsidéré konm zénan, konm déranzan ? Dann travay souvan-dé-fwa banna i tiliz so téknik, in téknik vié konm érod. Zis pou liminn a nou désertin poss résponsab, ala koman banna i taz a nou.

Tanzaot i donn in poss réponsabilité in moun, pa touzour lo pli konpétan, pli souvan pa lo pli méyèr, èk sa i donn a li in sharzman travay pou mèt a li dann traka é konm lé pa li lo pli gabié, rordinèrman li nyabou pa fé lo nafèr, zot i suiv a mwin ziska lèr. Aprésa fasil a zot di, la Rényon na pwin konpétans, oila poukoué ni sava touzour rod ayèr, zot i koné ousa i lé lo ayèr. Kan mi di sa, mi panss pa ditou lorganisasyon lo zé bann zil, pa ditou.

Konm mi di la bon o, sa i éspass pli souvan dann travay. Dann ladministrasyon konm dan lo privé. Daborinn, zot i ansèrv a zot lo pli gro é lo rèss i partaz shakinn inn ti ginn. An souvyin a zot kan bézman la pété la sékirité sosial, kan bann zanplwayé la fé la grèv, inn la fé rant lot, lot la fé rant lot konm sa dan la bwat ziskatan tout la famyi i di. Aprésa i pé di a nou la Rényon i mank konpétans, konm pou lo shyin i di, nou néna la gal. Oté bann gatèr, arèt di nou lé pa kapab, vik nou la pa éséyé. Parlfèt, tank mi panss, ousa lété nout lanbasadriss loséan indyin dann zé dézil ?