Kan li ékri kréol morisien sé kékshoz inportan pou ranfors lo morissyanism- mi oi sa plito konm lo santiman nassyonal morissien pou mète anlèr- mi panss bonpé rante nou sar dakor avèk li, kan ni koné linportanss noute kréol rényoné pou lo ranforsman noute lidantité rényonèz.

Aprésa li di galman i fo évite la grossyèzté é sa lé normal kan ni koné laba Moris banna l’apré diskite pou ansèrv kréol morisien dann ban sobatkoz zot sanm dépité. Mèm si mi panss tazantan i fo pouss in kou d’guèl kan wi pé pa fé antann aou an kozan in kréol polissé.

Astèr mi kalkil konm toulmoune é bann morisien zot ossi zot i kalkil dsi lo méyèr manyèr aménaz la lang pou gingn bien koz bann problèm ékonomik, sossyal, kiltirèl. In lang firamézir li doi adapt ali, aménaz ali tèl fasson toulmoune i pé éshanj dann la lang-kissoi kréol morisien pou moris, kissoi kréol rényoné pou nou, kissoi kréol séséloi pou bann séséloi.

Astèr Maunick i dénonss in pé linvazion dann lo kréol morisien bann kozman fransséépi bann zéspréssion bann zanglé. Astèr-la mi aplodi dë min pars dsi lo détour d’in fraz kan inkozman zanglé i rante ladan an zourite ébin dizon mwin lé dann kanal.

Alé ! Astèr mi rapèl azot in miniss moris, na pwin lontan la sèye koz kréol, mé madam la spikèr la kal aèl pars sa lété pa prévi dann régloman. Sa i anpèsh pa la spiker d’mobiliz bann député épi bann miniss pou fé rante kréol morisien dann bann sobatkoz… A kan in progré konmsa La rényon ? La pa domin la vèye mé tardra viendra.