Oté

Pa n’inport koman ! Pa n’inport de koi !

Justin / 21 novanm 2017

JPEG - 43.6 ko

Mi koné pa si konm moin zot i sava rarman la mèr. Kan ou nana lé shoz an profizyon, momandoné ou i ansèrv pi tro. Pou moin la mèr la fine ariv konmsa mé orozman nana demoun pou ratrapé pars momandoné, d’apré sak mi oi dann télé, na pi la plas pou poz in pyé dsi la sab si ou i vé pa marsh dsi l’moun.

Lé vré, pou in pti péi konm nou, nap poin bonpé la plaz : i pé kont dsi lo doi é anplis i ariv pa bien loin. I ariv pa bien loin ? Kroi pa sa, pars in pé i majine mèm lo trépé lé ankor tro. Si tèlman ké zot la mète a konstruir kaziman dsi la plaj z’ot gargote é si ou i oi lo mir ou i konpran bien la plaz l’apré rakokiyé.

Kisa la donn l’otorizasyon ? Moin pèrsonèl mi koné pa. A moins ké si ou i done in pyé nana désèrtin i pran in karo. Anpliské sa nana in pé i mète a mète tout kalité fotèy la plaz épi tout sort lékipman... Mi pans si i kontinyé konmsa, nou va vni konm Moris, sansa konm dann d’ot péi é si ou i rant dann z’ot l’androi rézèrvé par zot mèm, lé kapab larg lo shien dsi ou.

An touléka, la pa zordi la komansé. Pti lanp pti lanp demoun la kapar bor d’mèr é mi oi pa kisa i sava arète azot Amoins k’i fé la plaz in pé partou konm i fé Moris : nana ankor la plas mé i fo pa fé lé shoz n‘inport koman. I fo pa fé non pli n’inport de koi.