Mézami sète aprémidi, i paré méssyé lo prfé i sava kozé ; kozé mé pou di koué ? Si sé pou sak la fine mète dann zoinal, i vo myé li défatig son lorgane. I vo myé lilèss alé, ziska lo zour li va trouv in n’afèr nèv pou di. Kan mi di nèv, mi di kékshoze de bon, kékshoze lé vré, kékshoze lé éfikass. Konm bande morisien i di si i koze solman pou pa la boush pu, bin mi panss lé pa néssésèr.

Pou kossa mi di sa ? Pars fransh vérité dopi ké bononm-la i koze, li é lé zot, mwin la pankor trouv kékshoze de bon. Kékshoze konm : lo dignostik-oussa la maladi i sorte, koman li ariv, é koman i pé bate ali atèr é dann lo koman va bate ali atèr, la prèv par avanss dé sak i sava arivé. Pou mon par mwin la pankor trouv dann son boush in démonstrasyon syantifik in pti guiguine kansréti.

Romark azot bien la pa arienk profé é son lantouraz lé konmsa/dann toute radyo, sansa toute télé, i bate la lang toute la zoiné, mé kan la blag la fini ou lé pa pli avanssé k kan la komanssé. Promyé débu la di : in maladi nouvèl é sé pézapé k’i konpran lé shoze. Aprésa la di, rodi, é ro ro di même shoze. Si tèlman ké astère i koze avèk ou, konmsi toulmoune i koné, é la pa bézoin éspliké.

Méssyé lo préfé, néna in n’afèr i apèl la pédagoji, pou kossa wui fèrm sa dann out sak épi wi tir pa.. ? Amwin sé arienk pou kozé. Konm pou ou konm pou lé zote : la pa pars ou la pwin arien pou di, ké wi doi fèrme oute také. Ala lo sèl vérité ké ni antann zordi.