Mi sort oir dann télé la rouv in nouvo tram-train dann Lil-de-frans. Oté ! mi rakont pa zot koman sa té zoli. Koman sa i mark in progré partou ousa i mèt ali.

Alor, mi di dann mon kèr : la pa rienk nou i domann pou fé in nafèr konm sa. La pa rienk nou lé pou lo progré. La pa rienk nou la konpri koman in nafèr konm sa i pé rann anou sèrvis. Franshman, sar bon pou transport domoun, sar bon pou lékonomi vik i gaspiyar pa lénèrzi, sar bon pou lozman vik domoun va vni rèss pa tro loin pou ginye voiyaz in pé mié. Kosa d’mié ? Sa mem i fo pou nout péi !

Soman nana ankor in pé manzèr patat avèk la po, i sèy pa konprann akoz sa lé bon pou nou. Oubien konm in sèrtin mèr Saint André i kroi Kréol na ankor malol dann zié, i sèy fé pran anou pod’shanm po pla kouvèr. Sak i kroi anbrouye nout léspri, i tardar pa ginye zot réstrankil. Kréol la pi inbésil ! Non ! nou la pa tié kouyon pou pran la plas !

Justin