Zistoir-la, moin la antann Sinni kan bann zanfan La Creuse* la fé in konférans. Sa pa in zistoir noèl : boug la rakont sa, son san i sinye ankor par anndan. Son boubou la pankor sikatrizé. Boug-la la di : Momon téi travay dann mézon konm bone. Avèk mon pti sèr nou téi rès la kaz nout matante. In zour momon l’ashèt in pti sak nèv pou moin : moin lété fièr !

Soman in marmay plï gran la mont in pièj. Li la di amoin : « Ou mont bien sü piédboi, ou ? Alon kas Janmalak ». Moin la lès mon sak avèk mon pti sèr épï moin la grinp sü piédboi. Kan moin la dsann a tèr, moin lavé pï d’sak. Lo marmay lavé souk sa, kour ansanm. Alor, moin la di mon pti sèr : nou pé pa alé lékol, nou pé pa artourn la kaz matante. Va tié amoin ! Nou la marsh in gran zourné dann vid. Lo soir uit èr, la polis la ramas anou. Lasistans sosial la mélé, la di si i kontinié moin sar in délinkan.

Mon matant lavé pèr. Mon momon té i travay dann mézon. Zot la sign papié. Gouvèrnman la déport amoin. Ala pou kosa moin sé in zanfan la Creuse. Ala pou kosa mi réklam i rokoné tout la mizèr la fé amoin. Mi domann gouvèrman pou rokonèt son résponsabilité. Sa mem mon bï avan mont lao. I tard pa nora in nouvo prézidan La Frans. Akoz gouvèrnman i rokoné pa son tor ? Sansa, pa zordi, pa domin, gouvèrman la Frans v’alé Canossa.**

Justin

*Nana 48 zané, général de Gaulle, la pran Michel Debré konm prémié ministr. Sé boug-la, la mèt anlèr in politik déportasion. **En 1077, l’empereur d’Allemagne a été contraint d’aller à Canossa, les pieds nus dans la neige, pour demander au pape la levée de son excommunication. Le pape la lès ali moizi in bon koup de tan avan i rosoi alï.