Té ! mi antan konm dekoi Konsèy jénéral la flank a la port son bann CEC. Selon bann rèsponsab lo Départman, na konm in sùrpopùlasion travayèr dan zot bann sèrviss. An gro, i fo dégrésé.

Poitan, zot la fine amont zot valèr dann palé la Sourss là, ousansa dan bann zajanss Konsèy jénéral partou La-Rénion. Bann Rénioné lé kontan. Travay i avanss vit. Bann zajan téritorial i arèt pa dir linportanss travay bann CEC la fé. O-ki bourik. Zorèy koshon dann marmit poi.

Amoin Zistin, mi demann : ousa i lé le gran ladaptasion plan Borloo-là Nassimah la promèt anou ?
Dépi-k Gérard Larcher, minis i okùp lanploi, la di lù sar kontrol ankor plùs bann shomèr, sak i pèrd zot travay i voi zot traka doublé. Par-là, i tard pa koup zot salèr. Lot koté, la pa sùr trouv inn ot travay. Oté Nassimah ! si lé vré gouvèrnman-là, out kamarad, lé pou lanploi, intègr tout bann CEC i travay pou La-Rénion, olèrk palank azot dann bor kanal.

Zistin