Mi koné pa si bann z’ansien i rapèl, moin lé sir bann pli jenn la pa koni in n’afèr konmsa. Kosa i lé par l’fèt ? Kan Mittérrand la gingn zéléksyon prézidan la répiblik l’ané 1981, la gosh la form in gouvèrnman - parti sosyalis la gingn in gran majorité - é in pé téi kroi la gosh té parti pou dirij La Frans in bon gran koup de tan. Ni koné la suit, l’alternans é konpagni : la droit, la gosh, la gosh, la droit, étsétéra, étsétéra.

Mé la pa sa mi vé asplik tèr-la. Sak mi vé di sé ké dann tan-la, isi La Rényon l’avé in sénatèr Albert Ramassamy, in sosyalis konm zot i koné. In zour lo moun la parti fé in diskour pou dir li lé pa kont ède La Lorraine, dann tan-la an gran difikilté, mé téi falé pans galman La Rényon plis an difikilté ankor. Zot i kroi gouvèrnman la bate la min ? Pa ditou, o kontrèr. Promyé minis Pierre Mauroy la fé konprann ali i fo pa konfonn po d’shanm avèk pla kouvèr, la bien di ali lo ka k’i intérès azot an promyé lété La lorraine é pou La Rényon, in politik l’intégrasyon l’avé asé pou li... Mésyé lo sénatèr la pa di gran shoz pars zour-la li la konpri sak té i falé konprann : gouvèrnman téi pans in pé larzan l’asistans l’avé asé pou abat nout kolèr é pou soulaz doulèr nout péi.

Zordi, i parl in plan pou sov lékonomi La Brotagn é in pé i di la pa arienk La Bretagn lé dann malizé, mé l’outro-mèr osi, mé La Rényon sirtou, vi nout sityasion. Sak ni pé dir sé ké goiuvèrnman i pran pa la diréksyon pou fé in plan pou nou. Diskour Sin-Lui l’otèr la fine obliyé ? Sanm pou moin, oui... é ni oi bien nou l’apré pran diréksyon pou fou dann kanal. Nout l’avnir la pa roz ditou. Yèr La lorraine, domin pétète La Brotagn é pandan éstan la ? Kabri i manz salad.

Justin