La Rénion na la moitié dmoun i viv in pë bien, na la moitié dmoun i viv mal. Si i shanj pa arien, va kontinié konmsa. Pé s’fèr na dmoun i vë pa pliss kë sa pou nout péi. Pé s’fèr !... Solman, mi kroi plito nana in bon pé d’moun, in gran majorité d’moun, i vë shanj lé shoz.

Akoz sa ? Akoz nou lé pti konm in kok pistash dan la mèr. Tou l’moun i koné pa tou l’moun solman na tout kalité d’moun dann nout famiy : in pë nana in bon boulo, in pë nana in boulo an sold,in pë na poin travay dïtou. In pé i viv bien, in pé i viv mal. Nana toussala dann nout famiy épi kan i fé in rankont famiy, toussa dmoun i trouv inn-a-l’ot, épï i koz. I parl bann problèm inn konm l’ot nana. Konm tout lé famiy, tout lé solidèr, plizoumoin, sansa i fé in n’éfor. Alors nï souèt tout nout bann famiy i trouv in manièr ansort azot. Sé sak i fé k’in majorité dmoun i vé boujé, i vé shanj lé shoz.

Mi koné pa si la-ba dann Paris, bann moun anlèr i konpran anou bien. Na dé foi zot i kroi zot i koné mié k’nou sak i fo pou nou (sa in bann l’élit, sa !). Aprésa lo tan i pass, i pass, i pass épi nout problèm, in bon pé nout problem lé la-mèm. Pandan s’tan-la, kabri i manj salad.

Justin