Mi koné pa si zot la romarké, mé kan i ariv vakans pou bann moun dann l’émisfèr nor, i pass aryink dann télé bann z’émissyon la fine pass in foi dann l’ané. Dé foi, sa i ansèrv de riyin, pars in kouyonis i rèss in kouyonis, ké ou i oi ali in promyé foi ou sansa in dézyèm foi. Solman déssèrtenn foi, lé valab pars sa i pèrmète agard in gayar l’émissyon ou la pa vi kan la pass promyé kou.

Konmsa, nana dé zour, moin la agarde in l’émissyon déssi bann pèshèr lanjvin dan la komine Sin-Zozèf. Lé ga, pou alé vol dé poisson dan la mèr dann landroi-la, lé pa fasil oui ! Souvan dé foi, la mèr lé an shalèr : si ou i rant la-dan avèk out kanote, lé riskab bate aou dann koinn kap ; si ou i sava pèsh golète, gro-vag lé riskab alé avèk ou.
Pou gingn kossa, d’apré zot ? Inn-dé poisson, pars la pèsh mirakilèz la-ba, sa lé rar konm korn lapin.

Banna la trouv in bon l’idé : fé in l’anbarkadère-débarkadère, pars si ou i anbark, ou lé byin èz ossi débarké ; épi lo pli souvan possib, é pa in foi tazantan.
Toulmoun lé dakor : bann pèshèr lé dakor, bann téknisyin i di lé bon, larzan i an-mank pa... Solman voila, la shyass nana gro-vantr, pars zis dan landroi té i doi fé lo z’afèr, nana in pti pyé-d’boi i fo prézèrvé pars sa lé intéréssan pou la bio-divèrsité. Alors, toush pa li ! Sansa la loi i karsèr aou !

Sak lé drol, i ariv pa tonm d’akor, fé inn é prézèrv l’ote ; alor zot i konpran lo maléré sor bann péshèr. La i fo alé tribinal-la ?
Domaz, pandan s’tan-la, kabri i manz salad !

 Justin