Mé zami, moin la antann demoun apré plégné dann radyo trotoir. Sak té apré plégné l’avé katrovin z’an d’apré sak èl i di. D’apré èl, èl l’avé rant dann kar Sin-Dni é sito an rout, èl i apèrsoi èl la obli son kart son mézon. Lo kar fine démaré, èl i rèss dodan : tout fason èl i pans vi son laz, vi son kondisyon modèst él néna lo droi tranpor gratuit-an pliské sa, vi son laz èl lé fini péyé kèk é kèk zinpo é èl i pans bann kontrolèr la pa inimin kant mèm.

Mé oila, èl i pans a tort pars bann kontrolèr lo kar i éstop lo véikil é i mète a kontrolé é banna i kontrol aèl. Gasparin, Briné, Gasparin Briné èl i di sak l’ariv aèl. Mé oila, désèrtin kontrolèr lo kar na poin kom prénon « imin », ni konm nom d’famiy é zot i fé dsann lo madam épi i domann aèl 20 éro tout suit pou toutsuit épi i la done aèl in papyé an giz prosévèrbal.

Madam i kontant son sor mé d’apré èl tout son doulèr la lové d’in kou épi pti pa pti pa èl la rotourn son kaz. El la di son mari é pa inn jénès mi pé dir azot fé in fotokopi son kart avèk lo prosévèrbal pou anvoyé. Konm èl i di, lo bon nouvèl l’ariv plizyèr zour apré pou dir lo pv lété anilé. Mé, èl la pa parl lo vin éro ? Randi pa randi, o fon mi koné pa. El la pa parl zéskiz lo sèf sèrvis non pli.

A ! sa noré pa ariv dann désèrtènn vil lo kar lé gratuit. Sa l’ ariv dann in vil bann zanploiyé néna gro bra mé pti tète-i pr an pa kont vyé madam-la la iz son kor pou rann sèrvis lé z’ot… Par l’fète mi sort antann dann in bonpé vil zordi trans por lé gratuit é mi priyèr bondyé pou ké Sin-dni i fé konmsa dann in zour proshin. Mé pandan s’tan la konm i di kabri i manz salad !