Mésyé, Médam, La Sosyété, koz èk moin sé koz èk in kouyon-sé o pyé d’lo mir k’i oi lo mason. Moin lé sir é sèrtin sa in kozman bann lèktèr kréol rényoné nout zoinal Témoignages i koné dopi lontan. Mi pans zot i ansèrv kozman-la é anplis tazantan zot i ramas ali dan la boush galman. Pou kosa mi di sa ? Sinploman pars, d’apré sak mi kroi, bonpé rényoné é moin osi dann ta, nou lé désu oir lé shoz alé dousman konm zot i sava é lo rotar lé shoz i pran pou réalizé sa sé in n’afèr k’i pé pa fé plézir anou. Mé akoz anparl kabri ? Akoz anparl salad ? Pars si ni plant salad la pa pou donn kabri manzé : salad sé pou l’moun mèm si i donn lapin bann fèye dir épi volaye lo bann rotaye.I fodré kant mèm pa vi lo pri salad i vann ni sava donn sa kabri. Alor kasi, zèrb lapin, fèye jak, zèrb dolo, sa la pa bon pou zot sa ? I fodré anplis lèss azot manz nout salad ! La pa konmsa ni konpran la vi. Alé ! Mi kite azot rofléshi la dsi é ni artrouv pli d’van sipétadyé.