Mésyé, Médam, La sosyété, koz èk moin sé koz èk in kouyon-mé sé o pyé d’lo mir k’i oi lo mason. Mi pans zot i doi konète kozman-la é sak li vé dir é dann kèl ka i aplik késhoz konmsa. Dann ka in moun i ménas amoin kisoi mète boubou dsi mon lèv, kisoi mète mon tète o karé, sansa d’ot gayar zafèr ankor dann in zanr konmsa, mon répons i pé z’ète lo kozman moin la mark an-o la. Sépa si zot i oi la bien sène pars ko mi di souvan la vi sé in téat é dann in ka konmsa nou lé an plin dann in téat kan in moun ménasé i rèss san fé arien ziskatan i atak ali. Défoi i pé z’ète dé péi kan inn i prépar ali sèryèzman pou fé la guèr l’ot é l’ot i rèss san fé arien sansa i koz solman é i prépar pa li pou l’mové kou k’i sar tonm dsi li. Alé ! Mi kite azot rofléshi la dsi é ni artrouv pli d’van. Sipétadyé !