Oté

Pandann tan-la sé Paris k’i ri, so gran razèr d’pint-la !

Manuel Marchal / 23 avril 2020

JPEG - 43.6 ko

Souvan dé foi mi sava dsi rézososyo. La pa pou rakont mon vi, mon zimèr, mon bann strèss. Non, si mi sava sé pars mi yèm bien la manyèr mon bann zami i oi laktyalité : souvan mi di, mi aprann dé shoz é kan ou i aprann dé shoz, i pé dir ou la pa pèrd out tan san pour san. Mé kékfoi, mi doi dir in pé i fatig mon tété. I di dé shoz mi pans domin v’arété, mé i arète pa souvan défoi.

Konmsa mèm, mi lir lo bann komantèr désèrtin i fé dsi bann zélu : d’apré lo bann komantèr banna i ansèrv pa arien, kaziman la po patate. Banna i suiv arienk zot lintéré é si zot i fé in n’afèr la pa pou fé gagn la popilasyon, mé pou gagn in n’afèr zot. Zot va dir amoin i vo myé lèss kozé plito ké rouv son boush pou di in n’afèr. Poitan, kan ou i rofléshi bien :
Ou i pé malkozé dsi bann zélu, si ou i koné kosa zot i fé, mé si ou i koné pa kosa zot i fé. Ou i pé dir zot sé dé gratèr d’flan si ou néna la prèv zot sé dé gratèr d’flan pou vréman. Mé souvan ou na poin la prèv pou vréman.
Ou i pé di galman inn bann lé tro péyé pou sak zot i fé é astèr sa sé inn késtyonn poinnvizé. Zot lé tro péyé, sirman sa lé vré mé la pa arienk bann zélu lé tro péyè néna bann birokrate tro péyé, néna bann pistoné tro péyé, néna bann koko fromaz dann ladministrasyon lé tro péyé. Mé néna osi in kantité d’moun i fé bann travaye difisil, fatigan, salissan, danzéré é lé pa asé péyé. Tousa lé bien vré élé bien vré i fo modifyé in pé lé shoz dann nout sosyété.

Mé alon rovir dsi la késtyonn bann zélu. Sak i bate la lang dsi lo do banna zordi, pétète domin sé zot sar lo bann zélu-an touléka mi souète azot - é zour-la, moin lé kaziman sèrtin va bate la alng dsi zot kon m zot i bate dsi bann zélu koméla épi va di si, va di la, va di sosi, va di sola dsi zot. Zour-la kosa zot va anpans de sa : la pa moin, sé lé zot ! Mé malorèzman pou zot zot va fé parti d’lo paké é nora poin in ka partikilyé pou zot.
Zour-la zot va di : sé la fote Paris épi son sistèm gouvèrnman é so zour-la Paris sar kontan trouv bann boukémisèr pou défoss dési alé oir souvan défoi sé li mèm la pran bann désizyon pou raz la pint la popilasyon. Paris va ri é li sar bien kontann sa.