Dopi lot sominn, dapré sak mi wa, ék sak mi antan, konm zot dayèr, noré inndé gro servo isi, la fé in dékouvèrt pa posib, révolisyonèr konm pa. I parétré k’noré in fénomèn, i ménas a nou isi, la Rényon, i apèl sa, lo résofman klimatik !!!!!!!
Ziska télé, radyo, zournal, la désid toudinkou koz ladsi. Zéspèr lé invité, sondaz parsi , sondaz parla. Minm, éspésialis météo, i mèt in grin d’sèl. Mwin lé admandé, si mwin la pa fé in kosmar. Mé non, pa ditou.

Kosa, bann gran servo la i di a nou ? Ebin, sétané, la fé pli sho dabitid, la bat rokor la shalèr, la pli la manké, promyé fwa dopi sinkantan. Apartir, i fodra pi viv konmm avan. Episa, la pa fini, domin va fé ankor pli sho, siklonn i sora pli for, nora katastrof a gogo, nivo la mèr va gomanté, zinondasyon partou… I fodra prann prékosyon. Mi arèt la. Tousa, akoz résofman klimatik , bann léspésialis, i vyinn dékouvèrt , somin dèrnyèr !
Néna d’kwa d’mandé, si inpé i pran pa nou po d’kouyon, pou d’zaryéré. Foutor va ! Néna sépa konbyin d’zané, Paul Vèrgès lavé mènn son konba ladsi. Lo bann gran kosèr zordi, lavé ri son tèt, konm pou di, boug la lé fou, li répèt sak fwa lo minm shoz. Astèr, zot minm profésèr pou armont anou sak i atann anou domin.

Mwin lé admandé, si lo résofman klimatik, la pa dérèg lo servo in bann. Antouka, mwin la pwin lavoka a dispozisyon, konm inpé, sinonsa, domin matin minm, mwin té sar port plint.

Pol