Avank nout minis i sava éparpy aèl dann zil l’osan indyin, èl la koz ansanm tout bann Rénioné é sirtout ék bann zéli. La di sé promyé fwa él i koz si Lérop, sé pa si él va réisir mobiliz nout tout. Mé bon. In nafér i mét amwin kan ou ékout son kozman sék na pwinn problinm.
Kan bann konséyé zénéral l’Alians i domann ali fé in zétid si l’impak la réform sikrièr, èl i di lé pa la pinn konvink aèl, èl lé déza konvinki sa lé kapital pou nout péï. Solman èl i di anou osi inkièt pa, pou nou tout sra kompansé, ni pérdra par yin. Kan i koz a èl l’élarzisman, èl i di anou inkièt pa non pli, i sanzra par yin pou nou. Minm pou lé TOS èl i inkièt pa. Parlfèt èl i inkièt pa pou ryin.
Ni inmré zis konèt, avan èl i sava, kosa i tourn pa ron pou èl, kosa èl i trouv lé malizé zordi. Somanké va di anou tout i roul pou lo méyèr dann lo méyèr monn.

Justin