Lé vré pou vréman, la pasianss i guéri la gal. Ziska zordi nou ta po di “Banna pou zoué la ponp èk nou d’si la késtyon pou mèt réyoné résponsab dann nout péi“. Lé vré sa in rovandikasyon k’ni dwa port an réspé ziska tan na ariv o bout, ziska tan na war fé-klèr la d’si, ni vé pi manz réstan. Kèl rol ni pé zoué dan nout péi ? Na pwin lontan isi minm mwin la anparl de sa. Koman donn travay nout bann marmay ? Kèl plass néna pou nout bann marmay kanifié ?

Zordi mi aprann ké lo réktèr la Rényon la finn fé son tan isi, katran mi krwa, Donkalor fo trouv son ranplasman. Lé vré dopi lontan, konm i di ni ral lodèr. Néna touzour in nafèr lé pa bon, pou sa i mank a nou touzour in santim pou fé in léro, nout shyin néna touzour la gal tousala. Aforstan atann, ala zordi ni aprann k’lo réktèr la Rényon sora in Réyoné. Kèl fiérté pou nou ?

An plis zot i koné kisa i lé in réktèr ? La pa in baba shifon, sé lo moun k’lé résponsab tout nout lékol isi, dopi matérnèl, primèr, kolèz ziska linivérsité, konm diré mon ti-fyi, sé li lo patron. Na pwin lontan lo réktèr aktièl la di konm sa apré lo préfé, a li lo dézyinm la Rényon. La pa sak i ariv la di sa, sak i sava. Oté i prétan késtyon diplom lo nouvo néna an plis ké sak i fo, parl pi lo C.V. La konpétanss i mank a nou. Par dogré , aforss-aforss lo tan i anbéli !