In gran piblisité dann zournal, lo park nasyonal i rod son lékip dirizan : dis pèrsone. Lo diréktèr daoir la fine trouvé... Mi doute pa so lékip-la sar in bann moun kapab, instriyé, la pa tir zot diplome dann boit léssiv. Donk, lé bon pou nout péï ?
Sof ké mi poz amoin késtion. Mi domann amoin si dépi issi ziska La Frans, épi dann loutremèr, téléfone la pankor komans soné an kantité. Akoz mi di sa ? Akoz, mi romark kan i domann demoun pou okip in plas travay intéréssan, nana touzour demoun étranz i fé zot demann é i anvoy pa zot dingué !
Donkalor, zot lé pli for, pli zénial, pli kapab ké nou ! Sinonsa :
Ala in zafèr mi vann azot konm moin l’ashté : in lasosyasion té i rod in psikolog. Lavé in l’afish ann dan dsi l’mir, mé lavé poin lanons dann zournal. Kroi amoin, si zot i vé, kroi pa si zot i vé pa : na troi kandida la prézanté, dë téi sort déor té i vienn gingn zot diplom, té i koné pa ditou La Rénion. Alor, si fourmi i marsh sou la tèr kréol i koné, nana dmoun lé pli for k’nou ankor.
Donkalor, ala mon késtion : dann bann dirizan-la, nora rénioné, nora poin ? Ala mon késtion ! Mi fé romark azot la pankor in lakizasyon !

Justin