Na dé-troi zour konmsa, moin la vi Jacques Chirac dann télé. La pa amontr ali pou gaté, zis in pti bout fime. Donk moin la vi Jacques Chirac la fé fondasion pou « lo dévlopman dirab, épi pou lo dialog bann kultur ». Si nana in mové lidé, la pa sète-la : fransh vérité, lo dévlopman dirab, sa mèm ni vé, sa mèm nou la bézoin, sa mèm i fo pou in bon kalité d’vi déssi la tèr. Mète ansanm bann kultur pou konpar inn-a-l’ot, pou oir sak shakinn i amène de bien.

Mé si i anparl lo dévlopman dirab, i fo oir si sa sé kolonn vèrtébral lékonomi, sansa si sé in gadgète, si sé solman in sriz déssi lo gato. Dann promié ka, mi trouv lé bon, dann dézièm ka, pou moin sé in léskrokri. Parèy dann dialog bann kultur, soi i konsidèr tout nana z’ot valèr, konm in sort légalité ; Solman si i di nana in pé sé bann gran kultur é in pé sé pti kultur insignifian. Promié ka, moin lé dakor, dézièm ka, moin lé pa dakor.

Épi, i fo diskite dann lintéré kissa i fé dévlopman dirab : si, konm zordi, bann kapitalis i fé ladorasion dovan z’ot profi épi la mazorité dmoun i debout guète, moin lé pa dakor. Si la kultur sé in n’afèr pou bann kontanplatif, bann paréssé, bann zésploitèr, alor la, mi di : Pardon éskiz ! Sa la pa pou moin, akoz sa lé pa bon pou la mazorité d’moun ; ankor in foi : pardon, éskiz !

Justin