Dimansh pasé, la télé avèk radyo la bat tanbour pou in moun i apèl Derrand. Bononm-la la désid alé bat in karé dan la mèr, si mi tronp pa koté d’Sin-Zil. Li la parti èk in bann dalon ali pou amontr, d’apré sak moin la konpri, la mèr la pa in danzé piblik. Li té i vé amontr galman, bann rokin la pa danzéré si i pran prékosyon : pa sort kan nana la oul, pa sort kan la mèr lé mélanzé èk bann partikil, étsétéra, étsétéra, la ké lo ra. Toulmoun i koné, la p’ariv ali arien. Tan myé pou li, tan myé pou son bann dalon... Moin la fine di sak mi pans, é mi sava pa arparl de sa, sof kan va konèt in pé plis dsi lo fon dé shoz.
Sak mi rotien dann sak li la di, sé ké li la pa vi rokin, é sa i étone pa moin ditou. Dan la mèr, bordaz La Rényon, na poin bann ban rokin konm nana bann ban lo ton, sansa bonite épi d’ot poison ankor... Pou arvni dsi lo kozman mésyé Derrand, li la di osi li la pa vi bonpé poison. Poitan li lété dann Park marin. Poitan lo park, sa lé sansé arpèp la mèr avèk tout sort kalité poison, anplis ké ronouvèl bann koray, bann z’alg é tout sak i fé nana in bonpé la vi dan la mèr. Son konklizyon ? Kan in pé i di lo Park marin i ansèrv gard manzé pou rékin, li pans sa in kouyonad pli bèl ké la tèt lo bann moun i di sa.
Lé vré, lo Park marin i fé pa lontan la fé sa, donk lé in pé bonèr pou tir in bon konklizyon. Arzout èk sa lo l’obsèrvasyon lo boug èk son bann dalon, i pé pa di sa in tèst na in valèr syantifik. Mé si sak li di lé vré, kansréti in pti pé, bann moun la fé lo Park marin, a mon avi, i fo zot i inkyèt azot in pé pou savoir si lo Park marin i amèn in plis pou la mèr. Sanm pou moin, tazantan i fo fé in bilan, épi lé l’èr pou fé in bilan pars i pé pa koz d’in n’afèr san konèt si lé bon, si lé pa bon, si i ansèrv kékshoz ou bien si i ansèrv inn tyork. Fransh vérité !

Justin