Shak zanimo néna son ni, néna son l’androi d’vi é ni pans li santi ali bien ladan. Koshon lé bien dann park koshon. Bèf i yèm son park bèf. Volaye i yèm park poul… Romark anou bien la pa lo bann zanimo k’i koz sé l’moun é l’moun i pans li pé parl la plas bann zanimo alé oir sanm pou moin sé in n’afèr i rèss a prouvé. Mé alon pa obliy nou l’apré an parl in provèrb é in provèrb i ansèrv bann zanimo-dann in ka konm lé marké an-o la - i mète sa an sène pou parl demoun an sosyété. Si sak mi di lé vré, sa i vé dir, demoun i pé z’ète bien dann in landroi lé fé pou li. Astèr si ni rofléshi in pé, néna zanimo lé pa bien ditou dann landroi demou la fé pou zot, konm néna d’moun lé pa bien dann z’ot limèb, z’ot bidonvil, sansa z‘ot kaz é a bien kalkilé sa sé in n’afèr lé vré pou d’bon é sa i invite anou pou fé travaye nout tète. lé, ni artrouv pli d’van. Sipétadyé !