Témoignages - Journal fondé le 5 mai 1944
par le Dr Raymond Vergès

Cliquez et soutenez la candidature des Chagossiens au Prix Nobel de la Paix

Lakey lo sit > Chroniques > Oté

Parl pé ! Parl bien ! Sa i vé pa dir in pé la shoizi d’soutien léta kolonyal sa ?

vandrodi 28 févrié 2020, sanm Justin

Si ou i vé ou i pé ékout demoun koz dann radyo. Sansa ou i pé alé dsi bann rézo sosyo. Ou i pé mèm ékout bann zélu zot mèm é i fo bien ou i romark la klass politik rényonèz i ansèrv in pé – bokou konm boukémissèr. Ou i pé dir é tout demoun va bate la min, si néna dé shoz i marsh pa bien sé par la fote la klass politik La Rényon. Sak i marsh bien alor ? Sète-la lé natirèl sansa sé bann sèrvis l’éta i fé roul lé shoz ron.

La késtyon mi poz amoin sé si bann zélu-la klass politik - néna vréman lo pouvoir é si avèk son-sansa son bann-pouvoir, èl i pé shanj vréman lé shoz isi shé nou La Rényon. Lé vré bann zélu néna in sèrtin pouvoir : sète lo mèr lé pa pou néglijé, sète konsèy départmantal non pli, sète konsèye réjyonal i fo pa krash dosi non pli. Donk bann zélu néna in sèrtin pou voir.

Mé lo préfé, sa i apartien pa la klass politik rényonèz poitan sate i roprézant l’éta local néna pouvoir é bann vré pouvoir. Bann gran diréktèr bann sèrvis zot osi zot néna pouvoir é bann pouvoir inportan. Arzout èk sa tout lo pouvoir sak lé dann Paris, tousa lé inportan dizon lo pli iportan pou zèr lé z’afèr nout é épi nout pèp.
Donk pou moin si bann zélu néna désèrtin pouvoir, zot néna poin lo pouvoir shanj lé shoz pou vréman dan sans la volonté lo pèp rényoné.

An pliské sa si i tap dosi la klass politik konmsa, akoz i tap pa galman dsi lo sistème néo-kolonyal é dsi tout sak i fé ké lé shoz i rèss konm zot i lé… Pétète pars lé pli fasil tap dsi la klass politik La Rényon épi koush a tèr dovan lo sistèm néokolonyalis !
Si mi dizé azot i fo komans par shanj sistèm-la pou done bann rényoné in vré résponsabilité pou amenn nout bann zafèr konm k’i fo. Pars si ni pé pa fé rien dsi in bann pan inportan-kaziman ésansyèl - la vi nout péi, nout pèp, isi dann loséan indien i pé pa mète l’otèr dsi nou si lé shoz lé pa fé konm k’i fo. Pars ni pé dir épi répété lo sistèm lé mové é sé par li ké ni avans pa kon ni yèmré..

In n’afèr moin lé sir, èl lé konm sète néna in pé partou dan la Répiblik é ni pé pa di èl lé pou arien si nou lé dann la sityasion nou lé zordi mé pou moin lo prinsipal réponsab sé léta kolonyal ou néo-kolonyal épi son mèm konplis dann la klass politik rényonèz.
Donk sak i vé tapdsi la klass i pé pa non pli done nout klass politik in brové pou son konpétans, son lonèkté, son léfikasité. Ni pé dir politik, li pé tapé, mé san alonz ali bètman dovan léta kolonyal pars sa i aranj ali é la plipar d’tan i diviz anou : ni vé, ni vé pa, ni obliy atak konm i fo lo prinsipal réponsab é sète-la sé pou moin léta (néo)kolonyal.


Inn modékri, inn ti lavi, inn komantèr ?

signaler contenu


Facebook Twitter Linkedin Google plus