Na poin tro lontan, lo bann prézidan lo vinn-sèt péi l’Erop la vot in bidzé pou la pèriod 2014-2020. Biensir, an diminision par rapor lo dèrnié bidzé. Bien antandi, in bidzé sintir ! Pou kosa ? Pars in pé péi i vé sak zot i apèl l’ékilib bidzétèr. L’ékilib ? Sa in gayar mo, i fé pans l’Erop lé gouvèrné an bon pèr d’famiy. Sé sa mèm l’amèn la Grès épi l’Espagn épi l’Itali dann dézagréman. Omoin na l’arzan pou dépansé, omoin i dépans, oplis sak i apèl la komand piblik i diminié, oplis la prodiksion i dégrèn. Boudikont, sé la résésion !

Oui, mé pou désèrtin gran zournalis i antann dann télé, konm pou désèrtin politisien, i fo kontinié dann mèm shomin, lo shomin l’amèn l’Erop dan la kriz. Alor, pou zot, la p’asé, mèt ankor. Tanpir si bann péi pli rish i anrishi azot, é si bann péi pli pov i apovri. Solman, konm di lo kont, sa sé zot krédo é sa i doi, d’apré zot, amèn in bon rézilta. L’èr-la, mèm si lo bon rézilta lé pa la, pou zot, li doi èt la. Koman i apèl in métod konm sa si la pa la métod Koué ? I doi an avoir in bon rézilta, é si na poin in bon rézilta, sé ké la pa sèr la sintir konm k’i fo. Donk, fouy ankor in trou dann sintir-la. Afors séré, lé shoz va aranjé.

Lo traka, sé ké domoun, é an parmi bann dépité, i komans èt fatigé avèk so mové bon l’idé. Si tèlman ké mèrkrodi pasé, Parlman l’Erop la désid rozèt lo bidzé bann shèf d’Éta l’avé aprouvé na poin lontan. In bidzé i port dsi plizièr z’ané, sé dir si lé inportan. Si tèlman ké lo prézidan lo Parlman, in moun i apèl Schultz, la kas lé bob bann shèf d’Éta épi la di azot kontinié konm sa, si zot i vé k’i arzèt ankor in kou... Pou l’kou, lé fini avèk lo bidzé sintir. La suit ? Ki vivra véra.

NB : Mazine in kou, bann Parlman shak péi i désid in kou fé la mèm shoz. Nana kèk sounami pou arivé !

Justin