Kréol ? Noute lang, noute sivilizassion, nout manyèr viv ansanm-viv an dalonaz konm noute kamarade Lulu , zordi la fine pass l’ote koté la vi,téi di. Viv an dalonaz,na poin arien k’lé myé k’sa : dalon-dalone, ni boir dann mèm vèr, ni manz dann mèm zassyète, ni koz avèk lo mèm mo,, ni shante avèk lo mèm mizik.Nou lé zami mé pliské sa. Nou lé konpliss, mé pliské sa. Néna rantre nou in gatir tèlman for pou anmar anou ansanb.

Mézami alon anparl la lang : promyé manifèstassion lo jéni noute pèp.Sa sé kékshoz nou la fé-konm i di dann la piblissité-é si sé nou k’la fé, sé nou k’i doi grandi ali, sé nou k’i doi done ali lo maksimom plass dann la vi noute péi. Mi di é mi rodi la lang sé nout zanfan épi sé noute momon papa. Sirtou pa abèss ali, an kontrèr mète ali an lèr, lo pli gran otèr li pé arivé.

La lang ? sé noute pèp la akoush de sa,sé noute pèp la fé sa pou nou konprande inn-a – l’ote é pou nou avanss dann noute listoir.Sé noute simankol sé sak i fé ké noute toute nou sé pèp rényoné.La lang poto mitan noute kiltir, noute fyèrté, noute kolone vèrtébral .

Mézami si mi lanss azot in méssaz zordi,sé in méssaz fyèrté pars si sé nou k’la fé noute lang i fo nou lé fyèr noute kréassion-avan toute in kréassion popilèr. Sa la pa in kékshoz nou la anprété, sa la pa in kékshoz la done anou, alor si sé nou k’la fé i fo li sé noute fyèrt é.

A bon ékoutèr-salu.