Pou mwin la lite i doizète améné san répi, avèk lé moiyin k’i fo, épi le moune nésséssèr pou in bon défanss noute péi kont lo bande manifèstassion lo dérègleman klimatik .Mézami in problème sèryé i doizète pozé sèryèzman.Anou de voir :

- kossa ni pé fé pou anpèsh lo d’mèr rante dann l’étan Sin-Pol, dann l’étan Sin-lui é si lo nivo la mèr i goumante dë mète sé sak v’arivé ?
- kossa ni pé fé pou protèze noute nape fréatik pou alé rode lo prop dodan é sirtou pa dolo soumak .
- Kossa ni pé fèr ankor pou in laprovizyonman réguilyé an lo pou lélvaz, pou la plantassion pou nout fitir lindistri, é pou noute konsomassion.
- k ossa i fo fé pou noute lotosifizans alimantèr, noute lotonomi dann lénèrji, épi .An passan kossa ni fé avèk dolo i dévèrs san arété par milyon d’mète kib zour é nuite dann por Sinte-Rose.

Opliss mi ékri é opliss mi panss nou noré bézoin konm in ministère pèrmanan par nou mèm pou lite kont lo dérègloman klimatik si zot i vé konm in nouvo gran sèrviss internassionalizé pars tousèl ni pé pa granshoz, mé avèk noute bande voizin loséan indien la lé sir ni pé fé dé shoz. Lindianosséani pou nou sé lo travaye an komin é sirtou pa pou koz la boush rouvèr.Lé pa avèk la krash sa va marshé....Mézami mi yèmré dir si lé tar, lé pa tro tar mé boudikont mwin lé sir d’arien pars nou la fine pèrde bonpé d’tan .Pli pir nou la pass noute tan a pèrde noute tan. Ala pou kossa i fo ni arète lo rèstanplass, pli pir lo rokilade.

Oila po kossa nout lite i doi prande in nouvo dépar, oila pou kossa èl i doi pa zamé arété é sa v’amenn anou dann in méyèr défanss noute lanvironeman.

A bon ékoutèr, salu.