L’ané 2009, dann tan Sarkozy, la fé in z’Éta zénéro. La diskit lontan. La fé in bonpé propozisyon. Lé vré, in bann la désid zot i partisip pa pars zot té i kroi pa, ou sinonsa konm Didier Robert, zot l’avé poin arien pou propozé. L’avé pou boir épi pou manjé dan so z’Éta zénéro-la, mé moin na konm l’inprésyon la diskit dsi nout problèm. Défoi la diskit a-fon, é mi pans sé pou sa ké moin na l’inprésyon la diskit vréman dsi nout problèm. Touléka, sak moin lé sir, sé ké in bonpé Rényoné la partisip dsikisyon-la. Mi pans lé domaz l’arivé sak l’arivé. Si tèlman ké lo z’Éta zénéro la pèt pou désèrtin konm in gran sinéma pou ansèrv de riyin.

So kou isi, la fé in z’afèr an misouk épi la mèt zouzou-la dan la min bann Rényoné d’pasaz. Sak i kroi pa, lir soman lo bann nom : na bien san-trant pèrsone la poin granshoz pou siré èk La Rényon. Bann dépité èk bann sénatèr, sof Paul Vergès, la pa amontr lo bout zot né. Bann z’asosyasion té pa la. Bann z’aktèr l’ékonomi la pa bat tanbour dsi sak zot la di, dsi sak zot i propoz... Tousala, pèrsone i koné pa tro kosa i sa ansèrv... Na in radyo la koz èk mésyé Lurel pou domann ali pou kosa la fé lé shoz vitman-vitman konm sa. Li la réponn, pars i fo fé lo bilan an vitès pou lo poin final lo sink désanm èk prézidan la Répiblik.

I fo dir : tan myé si i désid promyèr ané sak i sava fé. Pèrd pa lo tan, sé in bon l’idé ! Mi koné mèm pa si nora lo tan lir lo dosyé z’Éta zénéro, pars na la matyèr la-dan. Mé olèrk fé vit, narté pa myé fé bien ? Sirtou si sa i angaz nout l’avnir.

Justin