Matant Zélida la ékrir Justin :

Mon shèr nové, mon spès salté, rouj de fon dovan l’étèrnité, l’ané i fini, l’ané i komans, bann rouj lé touzour apré fé d’moun lésonn moral, lésonn politik, lésonn zot nana rézon konmsi zot lété ankor dann lo parti k’i komann. Poitan nou lé loinn sa ! Si mi tronp pa, zot la fine pass lo tour zot é sanm pou moin zot lé pli pré lo zéro la gosh in shif donk pli pti ké inn, plito ké dsi la droit. In zéro dsi la gosh i vo pa granshoz, in zéro dsi la droit i miltipliy par dis. Donk la pa lo mèm z’afèr. Tok ! Pran sa pou toi.

Justin la fé pou répons :

Mon vyé matant i koz toultan la boush rouvèr, si i suiv aou parti kominis la fine pass son tour. Lèss amoin dir aou, sanm pou moin, in parti la fine pass son tour kan li port solman bann z’idé mor, bann z’idé dépasé. Poitan sé tout lo kontrèr é m’a amontr aou sa par inndé l’égzanp. Sé aou d’dir amoin si lé pasé sansa lé pa pasé.

L’idantité rényonèz : pasé pa pasé ? Pa pasé bien sir pars sé sak nou la bézoin pou nou ète bien shé nou épi bien par nou mèm. La libérasyon sosyal : pasé pa pasé ? Pa pasé biensir pars la pa li i santi sapin, sé lo mond kapitalis l’apré pouri sir pyé. La défans l’anvironeman : pasé pa pasé ? Pa pasé biensir, é la pa bézoin in gran démonstrasyon pou ésplik sa. La révolisyon kiltirèl : Pasé pa pasé ? Pa pasé biensir pars la kiltir sé lo téro pou fé lèv in mond nèv. In vré solidarité rant bann pèp : pasé pa pasé ? Pa pasé biensir é moin lé sir la mazorité d’moun lé dakor avèk sa. Lo dévlopman : pasé pa pasé ? Pa pasé biensir pars shak péi, shak l’androi la bézoin in l’oazis dévlopman dann son proksimité. La mashine pou rann sèrvis l’om plito ké mète ali dann in nouvo l’ésklavaz. Pasé pa pasé ? Pa pasé biensir pou rouvèr in bann nouvo karo la libèrté épi l’épanouisman.

Mi pé dir aou matant, tout sak mi sort di épi plis ankor sa i fé parti l’idéolozi parti kominis rényoné é in parti néna dann son l’idéolozi bann z’idé progrési konmsa, bann zidé nèv, la pa in parti mor, an kontrèr sé in parti bien vivan. Tok ! Pran sa pou ou.