Oté

Parti kominis rényoné in parti dann l’èr d’nout tan

Justin / 6 out 2019

JPEG - 43.6 ko

Matant Zélida la ékrir Justin :
Mon shèr nové, mon spès salté, rouj-de-fon dopi l’étèrnité, souvan dé foi mi antan azot apré dir Parti kominis lé bien dann lé zidé nout tan é poitan moin néna konm l’inprésyon sak zot i di lé pa vré. Pa vré pou kosa ? Dabor pars li lé kominis é kominis la fine disparète in pé partou épi dizon zot, bann rouj-de-fon zot lé bien èz kan zot lé izolé. Olèrk rouv dsi lo mond, ala ké zot i rofèrm azot dsi zot mèm. Normal PCR néna sosisantan : in laz pou pran son rotrète. Tok ! Pran sa pou toi

Justin la fé pou répons :
Mon vyé matant k’i koz touzour la boush rouvèr. Matant, ou i fé léspri, mé fransh vérité léspri-la olèrk ète in limour d’avangard, sré plito in l’imour laryèr gard mé i fé arien. Alon lèss sa épi koz dsi lo fon :
Lo fon matant sé in limanité lé riskab fini avan son tan par raport tout sak i ariv zordi é PCR i anons dopi in bon bout tan, lé kapab fini avèk l’om avan ké li konpran sak i ariv ali. Oui, matant lo dérègloman klimatik, ni vé ni vé pa, lé riskab pous l’imanité dann lo néan-la fin d’nout mond si ou i vé ! Sé pou sa, in kamarad la di : si i gingn pa la bataye klima, tout lo bann viktoir l’om i pé ranporté i ansèrv ar pa arien..
Matant dann bann zakor d’Pari l’avé prévi fé lo nésésèr pou pa fé goumant la tanpératir plis in dogré édmi. Parti konm lé parti nou lé riskab dépass troi dogré édmi la goumanatsyon é avèk sa ni pé dir nout poi lé o fé. Lo poi l’imanité lé o fé !
Pou kosa d’apré vou ? Pars l’om lé atiré par in kékshoz, pli démodé la pa posib. Yèr moin la di v’ariv lo zour demoun va kroir larzan va fé viv azot, va fé boir azot, va abiye azot, va done azot ankor zot soso, alé oir sar pi vré ditou é l’om nora tir ali, par li mèm, in bal dan n pyé. Mi di l’om, mé lé pli zis dir lo kapitaklism va krèz nout tonbo an mèm tan k’son tonbo ali mèm.
Tok ! Matant, pran sa pou ou !