Mésyé, Médam, La Sosyété koz èk moin s é koz èk in kouyon mé sé o pyé d’lo mir k’i oi bien lo mason. Mé zami zot i koné in shate la plipar d’tan i dor in sèl zyé-mi diré plito la plipar d’son bann sans lé révéyé - sé pou sa lé difisil sirprann ali. Mé si sa i ariv lo shate, sa i ariv lo moun galman dann danzé. In somèye lour é i pé ète la fin. Mé kozman moin la di la i rosanm in ménas in moun i adrèss aou, i vé dir aou pran out dispozisyon, sansa pran out prékosyon pou k’sak ou i vé pa i ariv pa ou. Dor pa dsi out dé zorèye konm i di pars i pé ariv aou dé shoz ou i vé pa. Pou kosa mi di sa ? Nou lé pa apré fé la guèr, lé bien vré. Mé sa i vé pa dir néna poin in kantité d’moun i viv dann l’insékirité é dann in ka konmsa sak moin la ékri an-o la, i pé rann sèrvis. Alé ! Mi kite azot rofléshi la dsi é ni artrouv pli d’van. Sipétadyé.