A bon ! Mi sort antann méssié Jégo dann télé. Pa promié foi, bien sir ! Mé shak foi, mi antann ali, moin l’apré demann amoin si boug-la i fé linbésil, si li pran anou pou in bann zinbésil, sansa ankor si na in pé dmoun i done ali fo ransègnman...

Méssié Préfé, pran pa la kolèr ! Moin la pankor nome out nom moin-la !

Donk, mi sort antann méssié Jégo, i sort dir, li oi pa kossa l’Etat i vien fé dann pri karbiran vik li gingn pa taks la-dsi. Donk si l’Etat i gingn pa in moné déssi in n’afèr li lé pa la èk sa. Bin koman sa l’arivé, in n’afèr konmsa ? Par zénérasion éspontané ? Sa i fé lontan napi la zénérasion éspontané ! Touléka, solon sak mi kroi.

Méssié Préfé, ou la pa di ali koman i kalkil lo pri lésans La Rénion, don ?Ou la kriy asé for sé ou le shèf dann zafèr-la !

Méssié Jégo, ou té i mète ankor koush daoir kan bann pri té kontrolé ? Na bien lontan lété konmsa é oila k’banna la pa di aou arien... ankor in foi ! Mé di amoin kissa i doi fiks bann pri, é koman i doi fiks sa ? Avan ou i propoz in réform, oubli pa fé travay out koko, pars si ou la manké, nora konsékans sa, oubli pa !.. ou noré poin lidé pass in n’ot patate sho-la ? Akoz pa la réjion ?

Justin