Matant Zélida la ékrir Justin :

Mon shèr nové, mon spès salté, rouj de fon dovan l’étèrnité, mi antann azot dir sé par Paul Vergès si la fé tèl shoz, sé par paul Vergès si la pran tèl désizyon, sé par li tèl progré l’ariv isi, sé par lo PCR nou la nyabou trap in n’ot afèr ankor... Zot i pans pa sa lé in pé égzazéré ? Zot i pans pa i dépass lo rézonab done in moun tousa kalité, tousa résponsabilité, tousa z’idé. Moin pèrsonèl m’a dir azot moin lé pa paré pou rokonète plis lo mérite ké li nana é an tou lé ka, moin nana dann mon kèr in gran om é mon pli préféré sé Michel Debré. Mi pans ala in om la mète vréman La Rényon anlèr é sé sète onmla. Tanka Paul Vergès ador ali si zot i vé, mète ali anlèr tout lo tan zot i vé mi pé dir zot pou moin li sé in anfan a koté Michel Debré. Tok ! Pran sa pou toué !

Justin la fé pou répons :

Mon vyé matant k’i koz toultan la boush rouvèr, moin lé pa étonné d’antann aou dir kékshoz konmsa, mé figir aou Paul Vergès la zamé domann in l’admirasyon san born bann rényoné, li la touzour domann lo droi pou fé son bilan, onètman, avèk son fors é son féblès. An touléka pou la bataye l’otonomi li téi koz konmsa ! Mi an souvien bien sak li téi di dann son bann diskour.

Astèr la diférans rant Paul Vergès é in gran om de droite, n’inport ékèl sé ké l’intéré La Rényon, l’intéré ban rényoné, la touzour okip son pansé pandan dé z’ané é dé z’ané. Kan li té isi shé nou biensir, mé galman kan li té an voiyaz, kan li té an konférans pou diskite dsi bann gran problèm. Mi sort lir dann témoignaz nout défin kamarad la soulèv plizyèr késtyon, plizyèr problèm, inportan pou l’avnir : lo problèm démografik lontan avan k’téi anons dis milyar d’moun dsi la tèr, lo problèm la sékirité alimantèr, la késtyonn klima, épi la lite rant l‘om épi la téknolozi. In portan pou lo mond, riské pou l’imanité !

An pliské sa, nout kamarad l’avé in vizyon dsi l’ésansyèl dann la vi bann pèp é l’ésansyèl lété pa touzour l’androi nou té i kroi : la libèrté ! Sé pa li téi vé fé lo parti réyoné la libèrté ? L’égalité é nout tout nana dann nout mémoir lo bann konba parti kominis pou l’égalité ! Nout rasine plonzé dann in bonpé nasyon : sansa pou kosa li noré mète maloya anlèr, sansa pou kosa li noré pans toultan tout rolizyon sa obliy bann rolizyon minoritèr ! Sansa pou kosa solon li nout lang kréol sé konm in z’outiy, nou jéni si zot i vé !

Mi arète la, pars moin lé sir dann nout domin bann zétidyan épi bann z’intéléktyèl, va ékri in sapèr kantité milyé d’paj dsi sète om la, é konm i di : « dopi in il ziska lo mond » é vis vèrsa, va éklate konm in vérité firamézir valé.

Paul ou i mank anou, mé ou la lèss anou in sakré kapital kant mèm.