Demoune la sorte dann Srilanka dann in rafyo rashté 8000 éro é ké lété si tèlman malfouti ké kan zot l’akost dann Diégo-Gracia bane militèr zanglé la ranplass lo rafyo par in bato matrikilé dann Srilanka in pé an mèyèr form, avèk manzé,dolo, é toute sak i falé pou fé in voiyaz... Pou rotourn Srilanka pli o nor Diégo Garcia é pa dann sid-est dirékssyon La Rényon. Mé lo bato la vni La Rényon.

Néna la in késrtyon inportan : Diégo Garcia i fé parti lo BIOT, donk li lé dann téritoir zanglé-par la fors, par la riz, an violan lo droi la dékolonizasion mé dann téritoir zanglé kant mèm é ni oi pa pou kèl rézon i diriz pa zot dann in téritoir zanglé pars si mi rapèl bien banna téi vé alé dann l’anglétèr. Par konte néna par-la 150 srilanké lé rotoni dann Diégo-Garcia é anpliské sa apré tash moiyin kite diégo pou alé oussa ? Néna in lavokate srilanké-britanilk l’apré pran zot défanss.

Astèr, néna ankor in bato srilanké la fine akost avèk diégo Garcia é apré tash moiyin vni La Rényon-zot sré 7 osinonsa 17. Zot i souvien méssyé lo préfé l’avé di la pa lo dèrnyé bato konmsi té in n’afèr normal zot fé 4000 km dsir in rafyo po vni La rényon san in protéstassion gouvèrnman fransssé, san in inssidan diplomatik san k’lo pti kok goloi i drèss in pé dsi son zèrgo.

Ziska zordi nou téi panss sa té in bande moune la sov zot péi pou évite la mor, mé zordi sa lé konm in lantante rant gouvèrnman bande blan san ké nou rényoné nou néna noute mo pou dir.. Mi rapèl in tan in préfé téi fé pa sak li vé-mèm si aprésa téi sézi témoignages in kantité foi-, é in lantante franko-britanik-amérikin avèk in gouvèrnman srilanké fantosh sa téi pass pa konmsa konm in lète a la post.

An touléka, sanb pou mwin bande forte pèrsonalité dann passé té i lèss pa fé lé shoz an missoukante konmsa. Mi koné demoune nora pa manke fé déklarassion é sirtou pa lèss lé shoz konmsa. Alor zanglé i koné vyol lo droi internassyonal mé zot i p arien kont in gou vèrnman fantosh apré sèye pran in boute téritoir shagoss pou li.-néna in prossé an kour.

Mi pas li nora trouv l’angle po atak bande zinpèryalist san tape dossi bande viktime.

A bon ékoutèr, salu.