Yèr matin mwin lété simetyèr lo Por pou in sérémoni dsi la tonb Paul Vergès… néna sinkan li la parti l’ote koté la vi. Sinkan lé gran épi lé kourte, assé lo tan pou konète kossa nou la pèrde. é mwin la antande in moun apré di anparl « in liv inashové ». D’inn sèrtène fasson la plipar rante nou kan ni take baro, é ni sava lé konmsa. Souvan dé foi dsi in plan pèrsonèl-dé shoze a réglé ka nou la pa gingn réglé – i ariv ossi konm dann ka Paul Vergès inashové pou nout péi épi pou lo monde antyé.- d’in il ziska lo monde al é rotour.

Souvan dé foi wi antande dir bann demoune i viv dann bannzil lé rofèrmé dsi zot mèm, konm dann in bul, konmsi zot téi koné pa kossa k’i éspass an déor d’zot bul é final de konte i intérèss pa zot. Mi panss lé bien domaze bande moune i di sa la zamé viv, konm nou dann la po demoune bannzil. Konm nou téi di kan nou lété pti arète pran zote ka pou in zénéralité. Mé lé normal koze konmsa sa i évite fé tro travaye la tète, sa i évite fatigué afors rofléshi, sa i évite kass son tète.

Mé nou, ni koné sa lé pa vré. Sa lé pa vré pou bonpé d’moune rantre nou. Sa lé pa vré pou bande militan parti kominiss rényoné fidèl par raporte nout parkour, fidèl par raporte nout listoir, fratèrnèl pars la fratèrnité la pa in parol anlèr. Pa vré ditou pou in moune konm Paul Vergès bien okipé a shanj la réalité dann son péi-La Rényon !-épi shanj la réalité an déor… Demoune la travèrss in syèk konm Paul Vergès la konète bonpé danzé mortèl pou n ou konm pou limanité. Ni koné toussa bande danzéla é shakinn lé mortèl si lé mal négosyé... si la lite lé mal améné.

Alor, nou, fèrmé dsi nou mèm ? Sa la pa vré ditou. Biensir bande kominiss la vanj konte léta aryéré nou lété d’dan momandoné, mé sa la pa anpèsh azot dsou la diréksyon Paul Vergès pratik la solidarité internassional... Alor si i di lo liv lé inashové, mwin lé sirésèrtin lé vré. Mi koné mèm pa si lo liv lété ékri an parti sansa an antyé dann léspri nout kamarade dirijan. Mi koné mèm epa si néna ankor plizyèr shapitre pou majiné é pou ékrir,.. Mé sak mi panss sé ké la suite la konstruksyon i doizète fidèl par raporte bande prinsipe noute kamarade Paul la mète anlèr dé zané édé zané...

Paul Vergès, parti dopi sinkan dann l’ote koté la vi. Mé in shédèv a kontinyé dann léspri son kréatère !