Matant Zélida la ékrir Justin :
Mon shèr nové, mon spèss salté rouj-de-fon dopi l’étèrnité sé dsi l’anvironeman mi vé trap aou zordi. Fransh vérité ou lé for pou fé léloj Paul Vergès-a kroir azot lo promyé ékolojis La Rén yon la produi. Dabor mi pans la pa vré ; épizapré mi oi pa lékolozis konm in rolizyon. Armète èk sa, nou dsi nout pti kok pistas dann loséan, kosa ni gingn fé pou l’anvironeman nou.éskiz mon pardon, kan ou sé in zéro la gosh in shif ou sé in zéro la gosh in shif. Méyèr z’afèr pou fèr sé d’fèrm out také. Tok ! Pran sa pou toi !

Justin la fé pou répons :
Mon vyé matant k’i koz toultan la boush rouvèr, i étone pa moin sak ou l’apré di.
Dabor, si ni di Paul Vergès sé lo promyé é mèm lo pli inportan ékolozis La Rényon la produi ébin ni di sa an konésans de koz. Ni pé an avoir i priz do bèk la dsi é sar pa dir pou moin amontr aou, nou bann rouj nou néna rézon dsi lo poin ou la soulvé.
Aprésa ou i di ou i s’anfou pa mal lékolozi poitan ou i dovré konète la natir lé dann danzé éla vi d’moun dsi la tèr galman, é néna arienk l’ékolozi pou gingn sov l’imanité. Mèm si ni pé z’ète dézéspéré zordi, pti lanp pti lanp nou va romant la pant. L’imanité va romont la pant. A inn kondisyon : sé d’ranvèrs lo rézime kapitalis konm li lé zordi.
An pliské sa ou i di sov l’anvironeman La Rényon sa i ansèrv arien vi ké nou lé pti gigine mèm. Promyèrman i ansèrv kékshoz pou nou mèm épi konm modèl..dézyèmman nou lé pti mé nout voi i port loin, é nout légzanp i pé port loin galman.donk ala in l’itilité pou nou é pou l’imanité. Tok ! Pran sa pou ou, é mète out moushoir par dsi.