Si mwin lé ankor la kan sète afèr- v’arivé é si par shanss i domann amoin mon poinnvizé, mi pans m’a mète l’aksan dsi tout la pozitivité nout parti, son bann dirijan, épi son bann militan lété kapab mobilizé dopi la kréasyon nout parti é ziska zordi. Malgré la difikilté, malgré lo bann l’anspèk la kal anou tou koté, mi kroi é mwin lé sir lé possib dékouvèr épi démontré nout parti lété pozitif an promyé par raport sak l’avé in sèl préokipasyon sé ral déyèr lo pèp rényoné, lo péi rényoné é l’avé in sèl bi sé d’lèss anou dann fénoir.Mi koné pa si zordi zot i konpran lo mal zot la fé arienk an ralan anou par déyèr alé oir nou téi sava dovan avèk rézolisyon,dann sans lo progré épi dann sans listoir.

Biensir mi pans tout bann shèrchèr mwin la anparl an-o la, an passan, zot sar blizé galman travaye dsi lo mouvman réaksyonèr, sak lontan nou l’apèl lo kont parti pou konprann pou kossa, zot la touzour été kont lo bann zidé nout parti é pou kossa zot la touzour bataye kont bann prozé nout parti téi vé mète an avan pou mète lo péi anlèr.Mi di sa pars lo parti réaksyonèr li ossi li néna son baz dann la sosyété rényonèz é son bann tirbilanss, pars son l’alyans avèk lo pouvoir néo-kolonyal la fé dé li in vinkèr provizoir, an atandan la pozitivité i trionf son tour, an atandan k’l o pèp é lopéi rényoné i rant son tour dann la voi nout dévlopman.