Témoignages - Journal fondé le 5 mai 1944
par le Dr Raymond Vergès

Lakey lo sit > Chroniques > Oté

PCR : Kominiss épi rényoné, la nésséssité noute doub libérassion

lindi 15 novanm 2021, sanm Justin

Mézami, mwin la touzour konsidère noute parti konm in parti d’libérassion sossyal épi nassional, lé dé an même tan. Ni pé dir kan nou la domande La Rényon départman franssé, nou la vote pou lo progré sossyal-kaziman pou la libérassion sossyal. Pli tar, l’ané 1959, kan nou la réklame lotonomi, ni pé di nou la vote pou in doube libérassion sossyal épi nassyonal.

Mi souvien, fitintan Paul Vergès la fé in gran lantrotien - pibliyé dann in pti liv vèr – é ladan li la anparl konm in nésséssité vanje pou noute dë libérassion, inn ké ni pé apèl sossyal, é l’ote ké ni pé apèl nassional : inn avèk l’ote é l’ote avèk inn é zamé inn san l’ote é l’ote san inn. Pars sa lété lo rézilta noute travaye téorik-sète bande militan é sète bande dirijan.

Aprésa nou la pa shanj pozission, nou l’avé dan l’idé ké ni lite touzour pou in doub libérassion é sa lété la baze mèm nou téi done noute travaye téorik. Mé lé zote pandan so tan-la, mwin l’avé dan lidé ké zot lété pou réklame la libérassion sosyal solman… Par égzanp kan téi parl légalité sossyal, ni pé di, sa téi doi amenn larzan dann port-moné bande rényoné, donk in l’amélyorassion zot nivo d’vi. Donk in l’avanssé dann noute libérassion sossyal.

Astère ni pé poze anou in sinp késtyon : èl i porte dsi lo dévlopman. Ni pé domandé si la goumantassion bande zalokassion, l’amenn in sirpliss dévlopman pou noute péi épi pou noute pèp. Si ni pé réponde par oui, ni pé di ala in mouvman an dirékssyon noute doub libérassion. Si ni pé pa réponde par oui, nou lé riskab pa avanss dan diréksyon noute dézyèm libérassion an même tan ké la promyère.

Mi rapèl dann tan l’avé in gran diskissyon la dsi. Pou kossa, Sinploman pou nou garde noute fidélité pou lo dê zobzèktif nou l’avé done anou kan nou la mète lo PCR anlèr-kan nou la kré ali.

(A suiv)



Inn modékri, inn ti lavi, inn komantèr ?

signaler contenu


Facebook Twitter Linkedin Google plus