Mézami si mi anparl azot noute parti kominis, souvan dé foi, sé pars sa lé inportan pou nou. Pou kossa ? Dabor pars li vanj pou noute doub libérassion, sossyal épi nassional konm mi di toultan. Sa lé inportan sa, zot i panss pa ? Mé i ariv ké ni panss pa sifizaman kék shoze konmsa. I ariv mèm ké ni obliye son linportanss é ni mète ali dann l’aryèr plan.

In zour in moune la di amwin in n’afèr. Ala l’afèr, mi vande aot sa konm mwin l’ashté... dann bande zané 1980, apré ké la frode dann zélékssyon l’avé prive noute parti bande zélu normalman téi mérite ali é ké toudinkou li la gingn n kantité zélu ; kissa té élu, bande militan sirtou, bande kamarade lété an parmi lo pli méritan.

I paré dann tan-la Paul Vergès noré di : ala lo komansman d’la fin. Mi koné pa si li la di sa konmsa, sansa si li la pa di sa pou vréman, mé fransh vérité ala in danzé téi tonb dsi nou é ké nou téi atande pa pou vréman. Avan nou té privé d’pouvoir-mèm si lo pouvoir té pa bien gran-ala ké lo pouvoir d’lélu téi tonb dsi nou é lété riskab afébli noute lorganizassion.

Mi ziz pa pèrsone mé mi di sinploman : ni koné lo rol noute parti, ni koné ké sé in rol fondamantal. Done anou lo shoi : alé in rényon pou bande zélu, sansa alé in rényon lo parti. Si mi ziz d’apré linportanss, mi doi alé la rényon mon parti-si mwin la pa gingn roganize amwin pou alé inn épi l’ote.

Mé kèl koté mi trouv mwin lé pli inportan ? Si sé konm élu, lé possib mi sava pa rényon mon parti é si mwin la fé sa in foi, akoze pa dë foi, épi troi foi : pyé doné shoval monté... Rèst a oir si mi aksèpt bann règloman mon parti : mon parti sé la sours ! Sé la ké mwin néna lo pliss la shanss trouv lo méyèr règloman é lo méyèr prinsipe.

La sourss ? Sé landroi lo lé pu pure, non ?