Zot té la avan nou. Zot valère lé pa lo mèm ké lé n’ote. Zot lé pou la sinplissité é zot i ziz pa demoune suivan zot kapassité pou fé bande zésploi téknik sansa téknolozik. Zot i rode pa dézorde avèk pèrsone zot i vé kontinyé viv avèk konm rishèss prinssipal sak i apèl la vertu.

Mi anparl de sa pars bande pèp-la lé dann danzé. Zot i pé disparète san ké ni atande, san ké ni soussyé lo danzé zot lé d’dan. Pars an pliss, néna déssèrtin gouvèrnman i soutien bande déstriktèr konm par égzanp lo Prézidan brésilien Bolsonaro kan i anparl bande zindien l’Amazoni.

Partou dsi la tèr néna in kantité pèp promyé. Zot lé souvan an minorité é zot i partaze pa lo même valèr ké bande pèp la vni apré é zordi zot lé an majorité é zot fasson oir lékonoi, oir la vi, oir lo bande rapor avèk la natir. Koméla é plizanpliss va anoarl bande kanak é dann la nouvèl kalédoni sé zot bande pèp promyé.

Nb-ni pouré anparl bande mikéas i viv dann déssèrtènn foré Madagascar é i boire pa d’lo pars néna poin dann bande foré zot i abite mé ni pé arvni la dsi.