Pou kosa mi anparl bononm-la ankor in kou ? Sinploman pou amontr bann politik néna dé fason pou amenn larzan : soi ou i komann ali, soi li komann aou é dann dézyèm ka, malèr pou ou. Kisa li lé Pépé Mujica ? in révolisyonèr,-in tupamaro-la vanj kont la diktatir bann miltèr dann son péi i apèl l’Uruguay é banna la fé pèye ali sa. Konm moin la di yèr :14 zané la prizon, 9 zané dann l’izolman, 7 zané san lir in liv épi dé zané dann fon in pui. Tapé, tortiré près tou lé zour.

Pou kosa ? Pars li té i vé vanj kont la mizèr é bann militèr konm bann koronpi l’avé poin mèm fason k’li pou oir lé shoz. Li rakont li mèm son kondisyon viv dann la prizon lété si tèlman difisil, in pé plis li téi pèrd la tète é li la nyabou shanj lo konsékans son l’anfèrmman. Olèrk fé pèrd ali la tète la prizon la rann ali pli dir, pli rézistan. Sa famm osi té dann la prizon éinn konm l’ot la pa pèrd la moral mé la ranfors zot moral. Konm in l’ékrivin russ téi ékri-pétète Maksime Gorki- : lavé dann san lo, bouyi dann san lésiv, nou sé bann pur anparmi bann pur.

Kan li la sort la prizon li la kandidate pou zéléksyon dépité épi aprésa sénatèr : lo pèp la mète ali anlèr. Aprésa l’ané 2010 la mète ali prézidan. Li l’avé san foi lokazyon pou vni rish, san foi lokazyon pou dor dann l’onèr li la pa shoizi sa : dabor li la di li arès son fèrm é li rèss pa dann palé é konm in pé téi rogard ali gro zyé : li la di bann pov, bann maléré v’alé dann palé kan nora la tanpète. Konmsa sink zané d’ran lo palé la ansèrv pou abrite demoun kont lo van la plui, lo tangaz.

Li la fé vote bann réform pèrsone dan la droit té i vé pa ; li la lèss plant zamal médikaman, li la fé in sistèm santé épi sosyal konm na poin dann l’amétrik di sid, li la lèss bann moun mèm sèks maryé inn èk l’ot. La libèrté té son l’idéal é arien téi vo pa la libèrté d’apré li. Mi sava pa di azot tout : dsi l’interet zot i pé oir sa … Zordi néna in dalon la di amoin li yèm pa kan i di Pépé Mujica lété pov : lo ga néna rézon pars Mujica li mèm téi di li la pa pov, li kontant ali pa granshoz. Mi koné sèrtin i diré pa sa, oplis zot néna larzan oplis lé bon pou zot. Pa vré mésyé Didier prézidan konsèye réjyonal.
Sé dann la prizon li l’aprann viv konmsa éli téi di : si moin néna in payass pou dormi asoir moin la pa maléré ! In légzanp pou sak i yèmré an avoir la fèss an or.