Lé vré lindi té i tonm Noël. Lé vré galman domoun, sak na lo moiyin, i donn kado bann marmay. Konm ni rès marmay ziska gran-sizo i koup gatir nout vi, nou pé dir toulmoun i pé em giny in kado kan noël i ariv. Parl pa moin pèr noël vik i prétan sa in mark boison* la invanté pou fé son piblisité.
Pourtan, dan lèst La Rénion a-ski prétan nana in pèr noël : in tan li lavé promèt larzan par valiz akoz "la défiscalisation". So foi isi sé la zone fransh dann lèst, pou troi komine : Sintandré, Brapanon épi Sinbénoit. Sint-roz épi Salazi va gard dann in trou. La poin pou zot ! Pèr Noël la fé koz son pti garson la télé : bann zournalis la pas la lang sü son soulié, kon dabitid, épi la di sé kaziman noël pou toulmoun i rès dann lèst.
Solman pèr noël Sintandré, i fo mèt in pé lord dann out vié koko : ou vé aral la-ba bann lantropriz i tonm d’ot koté ? sa i fé pa lanploi sa ! Kilé out plan pou La Rénion ? Ou la poin, sinon in plan mantèr pou pa shanzé ! Nou la fine konèt aou..... Ou vé diminié linpo, solman ou vé rogoumant loktroi d’mèr : domoun i komans krié, ou défil an zourit ! Ou lé kapab de tou !
Ou vé dévlop lèst solman ou rofîz lo tram-trin : domoun va kalkil aou pou sa. Kroi pa nou lé konm shovrèt, nou na la taye dan la tèt kan par isi nou va roul dann trin alèz, blèz. Domoun dan lèst sar kolé sü la rout konm karapat sü tété bèf mèg. Out zorèy i sifarpa ditou. kroi amoin ! Arèt avèk nou ! Pou moin ou la pa pèr noël, ou in vié pirat : inn konm Labuse, in labizèr d’sü.

Justin
*i di pa sa kokakola la invant pèr noël.