Na dé-troi zour dann in radyo, in madam, rousté vèy pa koman, té apré débite bann plantèr. Pou koué ? Pars dann domi-fénoir traktèr la poin la limyèr, avèk son loto èl la mank bate dédan. L’èr-la, son bil la lévé, son zamal la monté, rèd an ké d’bèf lo madam ! El la di bann plantèr na gro traktèr, nana gro kat-kat, lo mézon sé in shato, épi sibvansyon an pagaye, épi zot la pankor kriyé la fine done azot satisfaksyon. Arzout èk sa, madam-la té in vré patéfone, é téi répète sinkant foi lo mèm shoz. Si tèlman ké ou i fini par kroir l’ariv aèl la mèm zafèr sinkant foi.

Bien antandi in plantèr-li la di li lété plantèr !- la antann lo z’afèr, mèm z’ot madam la antann lo kozman. Ala ké la komansé : doné ! doné ! difizé ! difizé ! Si zot nana gro traktèr épi gro loto sé pars zot i travay plis ké toulmoun. Si zot i gingn sé ké zot i mérit ali. Zot i oi in pé lo zafèr é konm zot osi zot téi répète sa la okip lo radyo in bon bout tan. Moin mi ékout ! Pa pars sa i anrishi mon l’informasyon mé pars moin té apré oir si inn an parmi bann plantèr l’avé in n’ot diskour.

Lakèl ? Par égzanp l’insèrtitid pou l ’avnir. Par égzanp a savoir si gouvèrnman va tienbo son promès dsi lo sibvansyon. Par égzanp dsi bann APE ! Mé moin la pa antann anparl de sa. Sof par in moun la komans par dir li lé pa plantèr. Moin, pou mon par, moin la fèrm lo tik-tak lo radyo. Mé, moin la pans in n’afèr : sré posib ké bann plantèr i koné pa lo pyèz zot lé d’dan épi i ris fèrm dsi zot ? A moins ké pou pa agrav z’ot ka zot i anparl pa, é zot i profèr bransh dsi d’ot z’afèr. Amoins ké zot i kroi désèrtènn balivèrn.

Si sé sa, zot vizilans, sanm pou moin lé bien andormi é lo révèy lé riskab d’ète pénib. Apré moin la pans bann vré plantèr lé o travay donk zot i pèrd pa z’ot tran dann bann diskisyon intil sirtou kan lo péryod lé grav.