Dann Paris, déssi in sort gran léspas i apèl Shann-mars, dépi lo sèz-o-soir na in drol rogaton. Déssi bann gran nap noir, in kantité zasyète blan, vide. La pa in banké pou manzé, plito pou dé-manzé.

Dis mil zasyète blan, vide

Akoz dis mil ? Pars nana dis mil zanfan i mor d’faim, shak zour, in pé partou déssi la tèr. L’èr-la, mi kalkil, si dis mil pèrsone, i manz pli k’i an fo té i done la moityé z’ot ropa shak zour… si l’avé moiyin pou fé sa, dis mil moun nora pa mor d’faim. Mé, nora pa été sifizan pars déssi la tèr, nana a popré, in milyar d’moun i manz pa vant plin.

San mil pèrsone la réini

L’ané 1987, Zozèf Wrézinski , fatigué d’koz san rézilta, la déside domann demoun fé in gran rasanbléman déssi la plas Trokadéro dann Paris, pou di zot i rofiz la mizèr. San mil pèrsone l’a vni. Bann gouvèrnman la di zot i pran lé shoz dann z’ot min. La lang na poin lo zo !

Pou kèl rézilta ?

Mi di pa sak i fé i ansèrv de riyin, mé konm in bonpé d’moun, mi kroi sa in goute do lo dann in l’oséan la mizèr. Dann péi rish la mizèr lé konm in maladi kronik. Dann péi pov, la mizèr lé la pliské zamé. Dann bann péi nouvo-rish lé konmsa galman.
Pèr Zozef, banna la fé sanblan ékoute aou, sanblan solman. Ou i koné ète rish, sa i bouf le tan !

Justin