I di néna in prézidan lo gran péi i apèl l’amérik, mésyé Ford, téi gingn pa fé dë zafèr an mèm tan : li téi gingn pa kouri épi mash son sinegome. Pétète moin la fine rakont azot sa pars moin la touzour trouv zafèr-la in pé bizar-souvan défoi li téi tonm, patatras dovan bann zoinalis é pou in prézidan la pa in pozisyon pou mète ali an valèr. Astèr mi trouv sa bizar, pars la plipar d’tan ni fé dé troi zafèr an mèm tan : kan ni amenn loto, ni manyé la min pou tourn volan, lo pyé pou apiye dsi pédal é lo zyé pou rogard pano épi oir si néna poin in danzé an mèm tan-défoi mèm ni gingn jir é zot aménèr loto. Astèr si ou i fime, sansa si ou i lir ou i mète aou é lé zot an danzé pou vréman. Mé lé vré néna kalité zaksyon lé difisil fé an mèm tan konm sak moin la mark pli an-o la : sa sé in provèrb komorien é si mi tronp pa li invite anou si ni vé fé in n’afèr, fèr ali bien é konm i di sirtou pa anmèl nout pinso. Alé ! Mi kite azot rofléshi la dsi é ni artrouv pli d’van. Sipétadyé !