Ala in kozman i fé plézir amoin dann in tan pou gingn n’inport kosa i fo l’arzan. Ala in kozman pou rapèl lé z’inn é lé z’ot na dé shoz ou i pé gingn san l’arzan. Mèm ké l’arzan i pé pa donn aou tout éspès dé shoz. Dabor na l’èr ni réspir é lo san-bon bann flèr. Nana osi shanté bann zoizo épi la solidarité rant lé z’inn é lé z’ot. Na la boté natirèl sak la boté artifisyèl i gign pa trapé l’amour, lo vré l’amour sa i ashète pa, sa i vann pa. Lo jéni épi lo talan in moun sa osi l’arzan i donn pa, é l’arzan i ashté pa-mi pans mèm sa lé pa koté dan la bours. La pa tout z’afèr i apèl marshandiz dsi la tèr. Mèm si in pé i voudré ké lé konmsa. Par ébzanp bann kapitalis : pou zot na in sèl valèr sé l’arzan, é na pi arienk sa konm valèr. Lo kapitalism ? La kontradiksyon prinsipal avèk lo travay ! Tardra viendra i fodra inn dé dé i gagn é inn dé dé i pèrd : zour-la, konm i di, lo dé pol va fé inn - l’inité lo dé kontrèr avèk la finisyon lo kapital épi la finisyon lo travaye... Mi oira pa, mé mi éspèr lo mond va oir ali. Alé ! Ni artrouv pli loin.