Mazinn in kou, konm lané proshinn, mwa d’zyin-ziyé néna koup dérop foutbol an frans, èk tout péi lorop. Mazinn in kou in péi, kiswa Léspagn, kiswa Litali ousinonsa in ot i déklar forfé konm i di. Sipozon sé pou in késtyon blokaz laéropor, sipozon sé pou in késtyon lisans rofizé ou sinonsa in papié mal ranpli, sipozon boudikont i mankré inn. Ni pé minm pa maziné inn ti néstan, vik i pé zamé arivé, vik sa i éspass an érop, d’si lo kontinan éropéin.

Mazinn in kou, konm pou foutbol néna in régloman pou byin fé war sak lin a lot na lo drwa fé, é in péi i rofizré aplik lo régloman zistoman. Ni pé pa maziné vik i pé pa arivé, vik sa i éspass an érop d’si lo kontinan éropéin. Mazinn in kou, dann kouran in konpétisyon, in larbit i di konm sa “kan néna kornèr, mi donn pénalti parské sé mwin lo patron si térin“. Ni pé pa maziné inn ti néstan vik sa i éspass an érop, d’si lo kontinan éropéin.

Mazinn in kou poukoué pou lé zé dézil in boug ki sort déor i pérmèt a li mèt son kuyèr sal dann nout marmit gro pwa. Sa lé mazinab vik nou lé pi an érop, vik nou lé pi si lo kontinan éropéin. D’si lo kontinan éropéin néna réspèk lin a lot, i aplik lo protokol konm i di. Dsi lo kontinan afrikin banna i asis d’si lo protokol. Poukoué i mank a nou réspèk konm sa ? In lidé i travèrs mon léspri. Rapèl a zot, in boug déor, in loropéin la di konm sa “Lonm afrikin la zamé rannt dan listwar“. Boudikont li wa li pliské nou. Pétèt sépousa !